2 ნოემბერი: ქონების გადასახადის დეკლარაციის ბოლო დღე. ვის ეხება წელს და ვის აღარ

ფიზიკური პირის ქონების გადასახადის დეკლარაციის ვადის ამოწურვამდე ორი კვირა რჩება. კოდექსით დეკლარაციის ვადა 1 ნოემბერია, გადახდის 15 ნოემბერი. წელს ორივე კვირას ემთხვევა, ამიტომ ვადები მომდევნო სამუშაო დღეზე გადადის:

• დეკლარაცია: 2 ნოემბრის ჩათვლით

• გადახდა: 16 ნოემბრის ჩათვლით

ელექტრონულად წარდგენა ან გადახდა შესაძლებელია ბოლო დღის 24:00-მდე.

წლევანდელი მთავარი სიახლე ისაა, რომ ბინაზე, სახლსა და ავტომობილზე გადასახადი ოჯახების დიდ ნაწილს აღარ ეხება: გათავისუფლების ზღვარი 40 000-დან 100 000 ლარამდე გაიზარდა. თუმცა ორი რამ არ შეცვლილა. მიწის გადასახადი კვლავ არ არის დამოკიდებული შემოსავალზე. ვინც კი შარშან დეკლარაცია წარადგინა, შესაძლოა სისტემამ ძველი მონაცემებით ავტომატურად დაარიცხოს.

სამი კითხვა, რომელიც ყველაფერს გადაწყვეტს

1. აღემატებოდა თუ არა თქვენი ოჯახის 2025 წლის შემოსავალი 100 000 ლარს? თუ არა, ბინაზე, სახლზე, ავტომობილსა და სხვა დასაბეგრ ქონებაზე გადასახადი არ გეკისრებათ.

2. გქონდათ თუ არა მიწა 2026 წლის 1 აპრილისთვის? მიწაზე გადასახადი შემოსავლის მიუხედავად ითვლება, თუ შეღავათი არ გაქვთ.

3. წარადგინეთ თუ არა შარშან დეკლარაცია? თუ კი, წელს რა უნდა გააკეთოთ, იმაზეა დამოკიდებული, რა შეიცვალა. ამაზე ქვემოთ ცალკე ვისაუბრებთ.

ვინ ითვლება ოჯახად

ოჯახში ყოველთვის შედიხართ თქვენ, თქვენი მეუღლე, არასრულწლოვანი შვილები და გერები.

მშობელი, სრულწლოვანი შვილი ან გერი, და, ძმა, ბებია, პაპა და შვილიშვილი ოჯახის წევრად მხოლოდ მაშინ ითვლება, თუ თქვენთან მუდმივად ცხოვრობს და საერთო მეურნეობას ეწევით. ვინ ცხოვრობს თქვენთან ასე, ამის განსაზღვრას კანონი თავად თქვენ გიტოვებთ.

რა ითვლება შემოსავლად

ითვლება ყველა შემოსავალი, მათ შორის ისიც, რომელზეც საშემოსავლო გადასახადის შეღავათი გაქვთ:

• ხელფასი დარიცხული ოდენობით, ანუ გადასახადის დაკავებამდე და არა „ხელზე" მიღებული თანხა;

• ქირა და იჯარა;

• დივიდენდი და პროცენტი;

• ბიზნესის დასაბეგრი შემოსავალი;

• მცირე ბიზნესის სტატუსის მქონე პირისთვის სპეციალური რეჟიმით დასაბეგრი შემოსავლის 25%.

ყველაზე გავრცელებული შეცდომაა მოსაზრება: „ამ შემოსავალზე საშემოსავლოს არ ვიხდი, ესე იგი, არ ითვლება". საშემოსავლო გადასახადისგან გათავისუფლება ქონების გადასახადის მიზნებისთვის შემოსავალს ავტომატურად არ გამორიცხავს.

რა არ ითვლება:

• ოჯახის წევრისგან მემკვიდრეობით ან ჩუქებით მიღებული ქონება, ასევე განქორწინებით მიღებული ქონება;

• 2 წელზე მეტ ხანს ფლობილი საცხოვრებელი ბინის ან სახლის გაყიდვით მიღებული თანხა;

• ფიქსირებული გადასახადის გადამხდელისა და მიკრობიზნესის სტატუსის მქონე პირის ამ საქმიანობის შემოსავალი;

• საქველმოქმედო ორგანიზაციისგან მკურნალობის დასაფინანსებლად მიღებული დახმარება;

• დამსაქმებლის ავტომობილით პირადი სარგებლობა.

საზღვარგარეთ ცხოვრობთ? თუ საქართველოს მოქალაქე ხართ, მაგრამ არარეზიდენტი, ოჯახის შემოსავალში მხოლოდ საქართველოში არსებული წყაროდან მიღებული შემოსავალი ითვლება.

ოჯახის შემოსავლის დასათვლელად შეგიძლიათ გამოიყენოთ შემოსავლების სამსახურის გამომთვლელი.

რამდენს გადაიხდით

თუ ოჯახის შემოსავალი 100 000 ლარს აღემატება, გადასახადი ქონების საბაზრო ღირებულების 0.8–1%-ია. ზუსტ განაკვეთს მუნიციპალიტეტი ადგენს. საბაზრო ღირებულება 2025 წლის 31 დეკემბრის მდგომარეობით აიღება.

თუ ქონება წლის მხოლოდ ნაწილში გქონდათ, გადასახადი ფლობის თვეების პროპორციულად ითვლება. თვე სრულად ითვლება, თუ ამ თვის 15 რიცხვისთვის ქონება თქვენი იყო.

მაგალითი. ოჯახის 2025 წლის შემოსავალი 130 000 ლარია. ბინის საბაზრო ღირებულება წლის ბოლოს 300 000 ლარი იყო, ავტომობილის 40 000 ლარი. განაკვეთი 1%-ია.

ავტომობილი 2025 წლის 10 მარტს რომ ეყიდათ, მარტი სრულ თვედ ჩაითვლებოდა, რადგან 15 მარტს მანქანა უკვე მათი იყო. ასე გამოდის 10 თვე და გადასახადი 333 ლარი იქნებოდა 400-ის ნაცვლად.

ოჯახის შემოსავალი რომ 95 000 ლარი ყოფილიყო, ბინასა და მანქანაზე გადასახადი საერთოდ არ წარმოიშობოდა.

მიწა: ცალკე წესი

მიწაზე ვალდებულება 2026 წლის 1 აპრილის მდგომარეობით განისაზღვრება და ოჯახის შემოსავალზე არ არის დამოკიდებული. თანხა ფართობზე, დანიშნულებაზე, მდებარეობასა და შეღავათზეა დამოკიდებული. მისი გამოთვლა შეგიძლიათ მიწაზე ქონების გადასახადის გამომთვლელით.

თუ შემოსავლების სამსახური მიწის გადასახადს საჯარო რეესტრის მონაცემებით თავად გარიცხავთ, მიწაზე დეკლარაციის წარდგენა საჭირო არ არის. ამ შემთხვევაში საგადასახადო მოთხოვნას მიიღებთ.

შარშან უკვე წარადგინეთ დეკლარაცია?

აქ ყველაზე მეტი შეცდომა ხდება, რადგან სისტემა ზოგ შემთხვევაში ავტომატურად მოქმედებს. შესაბამისად წინა წლის დეკლარაციის შემდეგ თუ თქვენი ფინანსური ან ქონებრივი მდგომარეობა შეიცვალა, აუცილებლად წარადგინეთ განახლებული დეკალრაცია.

თუ ვადა გამოგრჩათ

გადაუხდელ თანხაზე ყოველ ვადაგადაცილებულ დღეზე 0.05%-იანი საურავი ერიცხება. დეკლარაციის დაგვიანებით წარდგენისთვის დამატებით ჯარიმაც შეიძლება დაგეკისროთ.

2 ნოემბრამდე - თვითშემოწმება

1. განსაზღვრეთ ოჯახის წევრები და დაითვალეთ მათი 2025 წლის შემოსავალი.

2. ჩამოწერეთ ქონება, მისი საბაზრო ღირებულება 31.12.2025-ის მდგომარეობით და ფლობის თვეები.

3. ცალკე შეამოწმეთ, გქონდათ თუ არა მიწა 2026 წლის 1 აპრილისთვის და ვრცელდება თუ არა მასზე შეღავათი.

4. შეადარეთ ყველაფერი შარშანდელ დეკლარაციას და გადაწყვიტეთ: ახალი დეკლარაცია, V-04 თუ არაფერი.

5. თუ გადასახადი გეკისრებათ, გადაიხადეთ 16 ნოემბრის ჩათვლით.

თქვენი შემთხვევა სტანდარტულს არ ჰგავს?

მაგალითად, წელს დაქორწინდით, ხელფასთან ერთად ბიზნესიც გაქვთ, ქონება წლის შუაში იყიდეთ ან საზღვარგარეთ ცხოვრობთ. ასეთ შემთხვევაში ჰკითხეთ Prive AI-ს. ჩვეულებრივი ენით აღწერეთ ოჯახის შემოსავლები და ქონება და ის დაგეხმარებათ გაარკვიოთ, გეკისრებათ თუ არა გადასახადი და რა უნდა წარადგინოთ.

სტატია მომზადებულია 2026 წლის 19 ოქტომბრის მდგომარეობით და ეხება ფიზიკურ პირებს. ის ზოგადი ხასიათისაა და არ წარმოადგენს საგადასახადო კონსულტაციას. კონკრეტული ვალდებულების განსაზღვრისას გაითვალისწინეთ ინდივიდუალური გარემოებები და თქვენი მუნიციპალიტეტის მოქმედი განაკვეთები.